نعتؐ
خوب ہے کھلی قسمت بے ثبات لفظوں کی
ڈھل گئی درودوں میں صوتیات لفظوں کی
اُن ؐ کے علم و حکمت کی اک گرہ نہ کھل پائے
ہو اگرچہ دامن میں کائنات لفظوں کی
ذکر جب بھی ہوتا ہے حسنِ ماہِ طیبہ کا
نور بیز ہوتی ہیں شش جہات لفظوں کی
معجزہ نظر آئے لفظ لفظ آقاؐ کا
چھیڑتے ہیں اہلِ فن جب بھی بات لفظوں کی
بارگاہِ مدحت ہے اور میں فرومایہ
کاش! کچھ سمجھ پاؤں رمزیات لفظوں کی
یہ تو سوز ہے دل کا، جاں بھی ہے گداز اس میں
کب ثنائے خواجہؐ ہے واردات لفظوں کی
گردِ راہ ہوتی ہے جادۂ عقیدت میں
کہکشاں جو بنتی ہے ساری رات لفظوں کی
وقفِ فکر و فن کردو مدحِ سرورِ دیں میں
اے قمر اگر چاہو تم حیات لفظوں کی
